Չափազանց վտանգավոր կլինի, եթե Ղարաբաղը համեմատվի Ղրիմի հետ. Շահնազարյանի պատասխանը՝ ուկրաինացի լրագրողին

Երեկ ԵԱՏՄ ինստիտուտի տնօրեն Վլադիմիր Լեպյոխինը Երևան-Մոսկվա տեսակամրջի ժամանակ անհասկանալի էր համարել  ՀՀԿ-ի նախընտրական ցուցակը՝ նշելով, որ ցուցակի առաջին տասնյակում ընդգրկված է «ակնհայտ արևմտամետ» Դավիթ Շահնազարյանը, որը «Ղրիմի միացումը ՌԴ-ին անեքսիա է անվանել»: Այսօր այս հայտարարությունը Շահնազարյանին անձամբ հիշեցրեց ուկրաինացի մի լրագրող, որը մասնակցում էր հրավիրված ասուլիսին:

Քաղաքական գործիչն արձագանքեց. «Դուք ինձ կներեք, բայց եթե երկրի շահից բխի Ղրիմի հետ կատարվածն անեքսիա չանվանելը, ապա ես կանեմ նման հայտարարություն: Ժամանակին ես Ռոբերտ Քոչարյանին մեղադրել էի ծայրահեղ պրոամերիկյան լինելու մեջ, հիմա ամերիկացիներն ինձ կարող են մեղադրել պրոռուսական դիրքորոշում ունենալու մեջ, քանի որ ես չեմ ճանաչում Կոսովոյի անկախությունը»:

Դավիթ Շահնազարյանն այս համատեքստում ընդգծեց, որ «չափազանց վտանգավոր կլինի,  եթե Ղարաբաղը համեմատվի Ղրիմի հետ, նման համեմատությունը մեծ վնասների կհանգեցնի»: 

Քաղաքական գործիչը հիշեցրեց, որ Ղարաբաղյան հակամարտության կարգավորումը հիմնված է Հելսինկյան եզրափակիչ ակտի հիմնական սկզբունքների վրա՝ ուժի չկիրառում, տարածքային ամբողջականություն, ժողովուրդների ինքնորոշում: