ԸՕ բարեփոխումների նախագիծն ուղարկվել է Վենետիկի հանձնաժողով. Իոաննիսյան

ՀՀ վարչապետին առընթեր ընտրական օրենսդրության բարեփոխումների հանձնաժողովի քարտուղար Դանիել Իոաննիսյանն այսօր Ընտրական օրենսգրքի բարեփոխման նախագծի քննարկման ժամանակ հայտարարեց, որ ԱԺ արտահերթ ընտրությունները պետք է տեղի ունենան սովորական համամասնական, ֆիքսված ցուցակներով` ոչ ռեյտինգային ընտրակարգով: Նրա խոսքով`  ռետինգային ընտրակարգն ամբողջությամբ մերժվում է, ինչպես սահմանված է կառավարության ծրագրում:

Իոաննիսյանը նաև հայտարարեց, որ կուսակցությունների և կուսակցությունների դաշինքների անցողիկ շեմն է իջնելու մեկական տոկոսով: «Անցողիկ շեմը մեկական տոկոսով իջնելու է և սահմանվելու է՝ կուսակցությունների համար 4 տոկոս, իսկ դաշինքների համար՝ 6 տոկոս: Նախատեսվում է, որ քաղաքական ուժերի նվազագույն քանակը, որոնք պետք է անցնեն խորհրդարան, անկախ անցողիկ շեմից, 4 է սահմանվում՝ ներկայիս 3-ի փոխարեն: Այսինքն` սահմանվում է, որ առնվազն 4 քաղաքական ուժից է ձևավորվելու հաջորդ խորհրդարանը»,- ասաց նա:

Իոաննիսյանը նշեց, որ Ընտրական օրենսգրքի բարեփոխումների նախագծի անգլերեն տարբերակն ուրբաթ արդեն ուղարկվել է Վենետիկի հանձնաժողով, ինչպես նաև ԵԱՀԿ/ԺՀՄԻԳ։