«Սանիտեկ»-ը հիմա թերանում է իր աշխատանքների մեջ. Կամո Արեյան

 Քաղաքապետարանի աշխատանքներն ընթանում են նորմալ, բնականոն ընթացքով, որևէ շեղում խաթարում չկա. լրագրողների հետ զրույցում ասաց Երևանի քաղաքապետի ժամանակավոր պաշտոնակատար Կամո Արեյանը:

Անդրադառնալով ԱԺ «Ծառուկյան» խմբակցության պատգամավոր, Երևանի քաղաքապետի թեկնածու Նաիրա Զոհրաբյանի հնչեցրած մեղադրանքներին, թե  տենդերն այնպես են արել, որ միայն «Սանիտեկ»-ը մասնակցի և շահի, ասաց, որ նման բան գոյություն չունի: «Պայմանագրին չտիրապետելու արդյունք է: Այս պայմանագիրը լավագույն պայմանագրերից մեկն է եղել, այլ բան է, որ կատարող օպերատորը թերանում է  իր աշխատանքներում: Խնդիրներն իր ներսում են»,- ասաց Արեյանը:

Դիտարկմանը, որ հիմա ամբողջ քաղաքն աղբի մեջ է, Արեյանը չհամաձայնեց:  «Անցած տարի ևս կրկնվեց նման դեպք «Սանիտեկ»-ի հետ: Հիմա «Սանիտեկ»-ը թերանում է իր աշխատանքների մեջ: Ես` որպես Երևանի քաղաքապետի պաշտոնակատար, պատվիրատու կողմ, կատարել եմ ընթացակարգով բոլոր քայլերը, այդ թվում քաղաքապետարանը տույժի է ենթարկել «Սանիտեկ»-ին: Խնդիրը նրանց ներսում է, նա` որպես օպերատոր, պարտավոր է կատարել պայմանագրով նախատեսված պարտականությունները, ինչը մենք մինչև վերջ պահանջելու ենք»,- հայտարարեց նա:

Արեյանը միևնույն  ժամանակ նշեց, որ «Սանիտեկն» էլ իր հերթին ընդունել է  մեղքը և ասել, որ պետք է կատարի իր պարտականությունները: