Վրաստանում բողոքի ցույցերը շարունակվում են

Թբիլիսիի կենտրոնում՝ խորհրդարանի շենքի մոտ, ոստիկանությունը ձերբակալել է «Միացյալ ազգային շարժման» մի քանի անդամի և հեռացրել ցուցարարների կողմից տեղադրված վրանները. հայտնում է РИА Новости-ն:  Խորհրդարանի շենքի մոտ իրավիճակը սրվել է, մոբիլիզացվել են հատուկ նշանակության ջոկատներ և հարյուրավոր ոստիկաններ:

 «Ռուսթավի 2» հեռուստաալիքի տվյալներով՝ ձերբակալվել է ընդդիմադիր պատգամավոր Նիկա Մելիան:

Հիշեցնենք, որ Թբիլիսիում բողոքի ցույցեր են սկսվել: Բանն այն է, որ Թբիլիսիի քաղաքային դատարանը 2017 թվականի դեկտեմբերի 1-ին մայրաքաղաքի դպրոցներից մեկում տեղի ունեցած զանգվածային ծեծկռտուքի հետևանքով մահացած երկու անչափահասների գործով որոշումն էր հրապարակել։ Ըստ որոշման՝ անչափահասներից միայն մեկի սպանության մեջ կասկածվողին է դատարանը մեղավոր ճանաչել։ Դատարանի որոշումը բողոք էր առաջացրել: Ակցիայի մասնակիցների կարծիքով` հետաքննությունն արդար չի եղել, և փորձ է արվում պատժից ազատել միջադեպի մասնակիցներից մեկին` դատախազության նախկին աշխատակցի որդուն: