Հայաստանը որդեգրել է կայուն զարգացման ուղին. Արփինե Հովհաննիսյան

ԱԺ փոխնախագահ Արփինե Հովհաննիսյանի կարծիքով` Սերժ Սարգսյանի դերն անուրանալի է երկրի պետականաշինության, խաղաղության ապահովման գործում: Ըստ նրա` անհերքելի է այն ավանդը, որը երեք տասնամյակների ընթացքում ունեցել է Հանրապետական կուսակցության առաջնորդը:

«Այսօրվա գործող իրողություններում խաղաղությունն ունի անուղղակի իմաստ, այն մեկնաբանվում է որպես կոռուպցիայի դեմ պայքար, անկախ դատաիրավական համակարգ, այլոց իրավունքների պաշտպանություն, բարիդրացիական հարաբերություններ հարևանների հետ, ժողովրդագրական աճի հիմնախնդիրներին անդրադարձ և այլն»,- ԱԺ հատուկ նիստում վարչապետի ընտրության քննարկման ժամանակ ելույթում հայտարարեց նա:

Հովհաննիսյանի խոսքով` կառավարությունների և իշանության առաջ պատասխանատվության հիմնական գործոնը կայուն զարգացման ապահովումն է: «Հայաստանի Հանրապետությունը, չնայած իրեն պարտադրված պատերազմի պայմաններին, որդեգրել է կայուն զարգացման ուղի, գնում է ժողովրդավարության ճանապարհով` անընդհատ իրականացնելով բարեփոխումներ»,-ասաց նա:

Արփինե Հովհաննիսյանն անդրադարձավ նաև ընդդիմության քննադատություններին՝ նշելով. «Եթե թվարկում ենք չարած խոստումները, կարծում եմ` օբյեկտիվ է ու ազնիվ թվարկել նաև այն խոստումները, որոնք կատարվել են, և նրանք, որ չեն խոստացվել ու էլի կատարվել են»: