Արցախում ականի պայթյունից տուժած Գարիկ Ղահրիյանը կոմայից դուրս է եկել

Մարտակերտի շրջանի Ղազանչի տեղանքում հակատանկային ականի պայթյունի հետևանքով տուժած` Արցախի Հանրապետության քաղաքացի Արամ Մկրտչյանը դուրս է գրվել Ստեփանակերտի հիվանդանոցից: Այս մասին Yerkir.am-ին հայտնեցին հիվանդանոցից: Հիշեցնենք, որ նրա մոտ առկա էր ներքին արյունահոսություն, փայծաղի պատռվածք, կատարվել էր փայծաղի հեռացում:

Ինչ վերաբերում է  Գարիկ Ղահրիյանին, ապա նա դուրս է եկել կոմայից: Հիվանդանոցի վերակենդանացման բաժանմունքից տեղեկացրեցին, որ տղան խոսում է, ինքնուրույն շնչում և արդեն սկսել է սնվել: Նրա վիճակը ծանր կայուն է:

Հիշեցնենք, որ նրա մոտ կատարվել էր զույգ ստորին վերջույթների ամպուտացիա, ուներ հեմոռագիկ շոկ` երրորդ ու չորրորդ աստիճանի, լրացուցիչ հետազոտությունների արդյունքում ի հայտ են եկել ողնաշարի գոտկային մասի երրորդ, չորրորդ ողերի ու փոքր կոնքի ոսկրերի կոտրվածքներ: