Նախարարը խորհուրդ է տալիս աջ ղեկ ունեցող մեքենաները վաճառել այն երկրներում, ուր կա համապատասխան երթևեկություն

Այսօր լրագրողները տրանսպորտի նախարար Վահան Մարտիրոսյանից հետաքրքվեցին, թե ինչ անեն աջ ղեկ ունեցող մեքենաների տերերը, երբ արգելվի դրանց շահագործումը Հայաստանում: Նախարարը խորհուրդ տվեց դրանք վաճառել այն երկրներում, որտեղ արգելված չէ համապատասխան երթևեկությունը:

Նրա խոսքով՝ եթե ծագեն խնդիրներ, կառավարությունը կգտնի օպտիմալ լուծումներ: «Տեսեք, ասում եք՝ ժամանակին արգելեիք: Եթե ժամանակին չենք արգելել, ուրեմն մի օր չպե՞տք է կանոնակարգենք դա ու օրենքին համապատասխանեցնենք»,- ասաց նախարարը:

Մարտիրոսյանի խոսքով՝ աշխարհն այսօր գնում է դեպի էլեկտամոբիլներ, երկրներ կան, որոնք  արգելելու են բենզինով մեքենաները, իսկ այսօր Հայաստանում աջ ղեկ ունեցող մեքենաները շահագործումից հանելը տարակուսանք է առաջացնում: