Սևանից ավելի մեծ ծավալների ջրառ անելու որևէ հիմք կամ նպատակ չկա. Արծվիկ Մինասյան

Սևանից նախատեսված ջրառը կատարվել է և սեպտեմբերի 15-ին դադարեցվել, այս պահին որևէ ջրառ չի իրականացվում. լրագրողների հետ հանդիպման ժամանակ ասաց ՀՀ բնապահպանության նախարար Արծվիկ Մինասյանը:

Նա նշեց նաև, որ Սևանի հարցով մտահոգվելու խնդիր միշտ կա, քանի որ այն ոչ միայն մեր կենտրոնական ազգային հարստությունն է, այլ նաև տնտեսական, էկոլոգիական, սոցիալական մեծ արժեք:

«Այս պահին Սևանի ջուրը 3 սմ-ով ցածր է, քան նախորդ տարի, ինչը պայմանավորված է նաև եղանակային պայմաններով, այսինքն` ջրի ավելի մեծ ծավալների գոլորշիացում է եղել: Ավելի մեծ ծավալների ջրառ անելու որևէ հիմք կամ նպատակ չկա: Ավելին` առաջիկայում կլինեն Սևանի վերաբերյալ քննարկումներ` աշխարհագրական սահմանափակումները, կենսաբազմազանության հարցը, ջրաքիմիական առանձնահատկությունների հարցը: Բացի այդ` 2001-2002 թթ. ընդունված օրենսդրական դաշտն այսօր էական վերանայման կարիք ունի»,- ասաց Մինասյանը: