«Ձեզ դրեք մեր տեղը». ազատամարտիկը 2 տարեկան թոռան հետ տեսակցություն է խնդրում

2015թ. նոյեմբերի 25-ին Նորք-Մարաշում վնասազերծված հանցավոր խմբի գործով դատավոր Արմեն Բեկթաշյանն այսօր թույլ չտվեց գործով ամբաստանյալ, ազատամարտիկ Խաչիկ Ավետիսյանի պաշտպան Գիվի Հովհաննիսյանին տեսակցություններ թույլ տալու վերաբերյալ միջնորդություն անել: Հովհաննիսյանը ցանկանում էր միջնորդել, որպեսզի դատարանը թույլ տա ամբաստանյալին՝ տեսնել իր թոռանը, սակայն դատավորը հայտնեց, որ դատարանն արդեն որոշում է կայացրել տեսակցություն թույլատրել միայն ծնողների, զավակների, ամուսնու կամ կնոջ հետ:

Խաչիկ Ավետիսյանը հայտարարեց, որ իր ծնողները մահացած են, երեխան խաղաղապահ զորքերում է ծառայում, և իր միակ մոտ հարազատը 2 տարեկան թոռն է:

«Ձեզ դրեք մեր տեղը»,- տեղից արձագանքեց ամբաստանյալներից մեկը, որի տեսակցությունների հետ կապված արգելքը չի հանվել, քանի որ, ըստ դատարանի, ներկայացված համապատասխան փաստաթղթերը կիսատ են:

«Դուք էլ ձեզ դրեք մեր տեղը»,- արձագանքեց դատավորը: