Փոխնախարարը պարզաբանեց, թե ինչու հենց 11 երկրում ՀՀ դեսպանները պետք է ուժեղացնեն տնտեսական բաղադրիչը

Կառավարության նիստից հետո լրագրողների հետ ճեպազրույցում ՀՀ տնտեսական զարգացման և ներդրումների փոխնախարար Գարեգին Մելքոնյանն անդրադարձավ ՀՀ դեսպանների ու հյուպատոսների աշխատանքի տնտեսական բաղադրիչի ուժեղացման հարցին։

Նշենք, որ այսօր կառավարությունը հաստատել էր արտաքին քաղաքականության տնտեսական բաղադրիչի ուժեղացմանն ուղղված ծրագիր, որում ընդգրկված է 11 երկիր։

Լրագրողները հետաքրքրվեցին, թե ինչո՞ւ այդ 11 երկրների թվում ԵՏՄ երկրներից միայն Ռուսաստանն է, արդյո՞ք դա չի նշանակում, որ Հայաստանը ԵՏՄ երկրներում տնտեսական բաղադրիչի ուժեղացման հեռանկար չի տեսնում: Գարեգին Մելքոնյանը պատասխանեց, որ 11 երկրներն ընտրվել են առավել թիրախային լինելու չափանիշով` հաշվի առնելով այդ երկրներում ՀՀ դեսպանությունների կարողությունները, տվյալ երկրների հետ առևտրա-տնտեսական հարաբերություններն ու ապրանքաշրջանառության ծավալը, հայ համայնքի առկայությունը և այլ չափանիշներ։

Ըստ փոխնախարարի` հետագայում մշակվելու է միջին ռիսկայնության երկրների ցանկ, որը կհամալրվի այլ երկրներով։