Լոնդոնում տղամարդը շշերով ու աթոռներով «կռվել» է ահաբեկիչների դեմ

Լոնդոնի ահաբեկչության ականատեսներից մեկը BBC-ին պատմել է, որ այդ ժամանակ փորձել է օգնել մարդկանց` դանակներով զինված ահաբեկիչների վրա գարեջրի շշեր ու աթոռներ նետելով:  Ժերարը պատմել է, որ գարեջրատներից մեկից վերադառնալիս տեսել է դանակներով զինված 3 ահաբեկչի.

«Մարդիկ գոռում էին` փախեք, սրանք ահաբեկիչներ են,նրանք բոլորին դանակահարում են: Նրանք մտնում էին բոլոր բարերն ու գարեջրատներն ու դանակահարում մարդկանց: Ես նրանց վրա շշեր, բաժակներ, աթոռներ էի նետում: Փորձում էի փրկել հնարավորինս շատ մարդկանց, բայց ես անպաշտպան էի. եթե վայր ընկնեի` նրանք ինձ կսպանեին: Գիտեմ, դա գուցե ծիծաղելի հնչի, բայց ես փորձում էի այդ կերպ օգնել մարդկանց»,- պատմել է Ժերարը:

Հիշեցնենք, որ նախորդ գիշեր Լոնդոնում 2 ահաբեկչություն է տեղի ունեցել. Լոնդոնի կամուրջի մոտ միկրոավտոբուսը քշել է հետիոտնների վրա: Մեկ այլ վայրում ահաբեկիչները դանակահարել են անցորդներին:  Արդյունքում զոհվել է 7 մարդ, վիրավորվել 48-ը: