Հաց բերողին հուղարկավորելու են տանում ծափերի ուղեկցությամբ. լուսանկարներ

Հաց բերողի՝ Արթուր Սարգսյանի հուղարկավորության թափորը շարժվեց դեպի Շահումյանի գերեզմանատուն, որտեղ և նրան քիչ հետո կհուղարկավորեն: Արթուրի աճյունը սգո սրահից հանեցին ծափերի ուղեկցությամբ:

Հիշեցնենք, որ «Սասնա ծռեր» խմբին օժանդակելու մեջ մեղադրվող Արթուր Սարգսյանը, ով ՊՊԾ գնդում  գտնվող խմբի անդամներին հաց էր հասցրել, մահացել է մարտի 16-ին «Արմենիա» ԲԿ-ում:

Արթուր Սարգսյանը կալանավորվել էր երկու անգամ: Առաջին անգամ նա ազատ էր արձակվել 2016 թվականի դեկտեմբերի 31-ին, քանի որ ազատազրկման հետ անհամատեղելի հիվանդություն ուներ: Սակայն փետրվարի 9-ին նա կրկին կալանավորվել էր: Արթուր Սարգսյանը հացադուլ էր հայտարարել եւ պահանջում էր փոխել իր խափանման միջոցը` կալանքը:

Մարտի 6-ին ՀՀ գլխավոր դատախազությունը բավարարել էր մի քանի տասնյակ պատգամավորների երաշխավորության միջնորդությունն ու Արթուր Սարգսյանին ազատ արձակել: Նրան «Դատապարտյալների հիվանդանոց» ՔԿՀ-ից անմիջապես տեղափոխել էին «Արմենիա» ԲԿ, որտեղ և նա վիրահատությունից հետո գիտակցության չէր եկել: