Պատրա՞ստ եք ցտեսություն ասել ահաբեկչությանը. Թուրքիայի վարչապետը դիմել է ժողովրդին

Թուրքիայի վարչապետ Բինալի Յըլդըրըմը ապրիլի 16-ին կայանալիք հանրաքվեի քարոզարշավի շրջանակներում առաջին անգամ ելույթ է ունեցել Անկարայի Քահրամանքազան շրջանում:

Ըստ Demokrathaber-ի՝ Յըլդըրըմը  հայտարարել է, որ Թուրքիայի իշխանությունները թույլ չեն տալու, որպեսզի «ահաբեկչական ստոր կառույցները» պառակտեն երկիրը:

Բացի ԴԱԵՇ ահաբեկչական կազմակերպությունից, Թուրքիայի վարչապետն անդրադարձել է նաև Թուրքիայում ահաբեկչական համարվող Գյուլենական շարժմանն ու Քուրդիստանի բանվորական կուսակցությանը:

«Գնալով նեղանում են նրանց գործունեության մասշտաբները: Նրանք էլ գիտեն, որ 48 օր է մնացել: Գիտեն, որ մեր ժողովուրդը փոփոխություններին ասելու է «այո», ինչը նրանց վերջն է տալու: Դուք չմտահոգվեք, մոտեցել է օրը: Մոտ է օրը, որ նրանք այս երկրից վերանան: Պատրա՞ստ եք ցտեսություն ասել Գյուլենական շարժմանը, ՔԲԿ-ին և ԴԱԵՇ-ին»,- դիմելով ժողովրդին՝ ասել է Թուրքիայի վարչապետը:

Նա հավաստիացրել է, որ «ահաբեկչական կազմակերպությունների» վերջը տրվելու է հենց հանրաքվեի օրը՝ ապրիլի 16-ին: