Բելառուսի Գերագույն դատարանն ուժի մեջ է թողել Լապշինին Ադրբեջանին հանձնելու որոշումը

Բելառուսի  Գերագույն դատարանն ուժի մեջ է թողել Ռուսաստանի և Իսրայելի քաղաքացի Լապշինին Ադրբեջանին հանձնելու որոշումը. հայտնում է РИА Новости-ն` նշելով , որ դա վերջին ատյանն էր, որտեղ նա կարող էր բողոքարկել Բելառուսի գլխավոր դատախազության կայացրած որոշումը:

Հունվարին Բելառուսի գլխավոր դատախազությունը Լապշինին, ով ադրբեջանական «սև ցուցակում» է ԼՂՀ այցելության համար, որոշել էր հանձնել Ադրբեջանին: Մինսկի քաղաքային դատարանն այդ որոշումը թողել էր ուժի մեջ: Բլոգերի փաստաբանները որոշումը բողոքարկել էին Գերագույն դատարանում:

Ի դեպ, Բելառուսի նախագահ Ալեքսանդր Լուկաշենկոն հայտարարել է, որ Մինսկը որևէ հիմք չունի Լապշինին Ադրբեջանին չհանձնելու համար:

Ադրբեջանական haqqin.az-ն էլ է անդրադարձել Բելառուսի Գերագույն դատարանի որոշմանը` իր լուրը վերնագրելով` «Մոտակա ժամերին Լապշինին ձեռնաշղթաներով կբերեն Բաքու»: