«Ես իմ գերագույն հրամանատարին սիրում, հարգում եմ». Արարատի մարզի գյուղապետերը հրաժարական չեն ուզում տալ

Այսօր պաշտոնից հրաժարվելու դիմում է ներկայացրել  Արարատի մարզպետ Ռուբիկ Աբրահամյանը: Ըստ մամուլի տեղեկությունների` իրենց պաշտոններից կհրաժարվեն նաև նախկին վարչապետ Հովիկ Աբրահամյանի մտերիմ համայնքապետերը, խոսքը Նորաշենի, Դիտակի, Մխչյանի, Արևշատի համայնքների մասին է:

Yerkir.am-ի հետ զրույցում Դիտակի գյուղապետարանի ներկայացուցիչը հերքեց այդ տեղեկությունը` ասելով, որ Դիտակի համայնքապետը մտադիր չէ հրաժարական ներկայացնել, և որ տեղեկությունները սուտ են: Հրաժարականի մասին լուրը հերքեցին նաև Նորաշեն, Արևշատ համայնքների ղեկավարները: Մխչյանի համայնքապետը համառորեն էր պատասխանում հեռախոսազանգերին:

Նորաշենի համայնքի ղեկավար Նորայր Գրիգորյանը նշեց. «Ինչո՞ւ պետք է հրաժարական տամ: Ես անկուսակցական մարդ եմ, ժողովրդի կողմից ընտրված: Ես իմ գերագույն հրամանատարին սիրում, հարգում եմ, որոշումները հարգում եմ, որտեղ իմ գերագույն հրամանատարի կարծիքը, այնտեղ էլ` մենք»:

Հարցին, թե ինչո՞ւ Արարատի մարզպետ Ռուբիկ Աբրահամյանը հրաժարական տվեց, Նորայր Գրիգորյանը պատասխանեց. «Հնարավոր է` հիվանդ էր, հնարավոր է` ժամանակավոր հրաժարական տվեց»:

Արևշատի համայնքի ղեկավար Գոգոլ Նիկոլյանը նշեց. «Անհնարին է, որ ես հրաժարական տամ, ինչո՞ւ պետք է հրաժարական տամ: Ես Հանրապետական կուսակցության անդամ եմ, մնալու եմ որպես Հանրապետական կուսակցության անդամ»: