Էրդողանը Թուրքիայի հայերին բնակչության մաս չի համարում

Թուրքիայի նախագահ Ռեջեփ Թայիփ Էրդողանը ելույթ է ունեցել Vodafone Arena  մարզադաշտում` զոհվածների հիշատակին կայանալիք ֆուտբոլային հանդիպումից առաջ:

Ըստ Demokrathaber-ի՝ Էրդողանն իր ելույթում ներկաներին բացատրել է, թե ինչն է երկրի դրոշը դրոշ դարձնում:

«Թափված արյունն է, որ դրոշը դարձնում է դրոշ: Հողը հայրենիք է, երբ հանուն դրա զոհվող կա»,- ասել է նա՝ անդրադառնալով ահաբեկչության դեմ պայքարի կարևորությանը:

Էրդողանի խոսքով՝ Թուրքիան ահաբեկչության դեմ պայքարի իր պատմության ամենադժվար ժամանակահատվածներից մեկն է ապրում, իսկ դա հաղթահարելու են` «միասնական լինելով»:

Միասնականության մասին իր խոսքում նա թվարկել է Թուրքիայում ապրող ազգություններին, որոնք, նրա խոսքով, կազմում են «Թուրքիայի 80 միլիոն բնակչության մի մասը»:

«Մենք մեկ ազգ ենք՝ թուրքով, քրդով, աբխազով, բոսնիացիներով… Մենք այս բոլորով կազմում ենք 80 միլիոն ազգ»,- հայտարարել է Էրդողանը՝ Թուրքիայի հայությանը հերթական անգամ հրապարակավ չհամարելով երկրի բնակչության մի մաս: