«Անչափահասներին ամուսնացնել նրանց բռնաբարողների հետ». Էրդողանի կուսակցության սկանդալային որոշումը

Երեկ կեսգիշերին Թուրքիայի մեջլիսում սկանդալային առաջարկ է քննարկվել, համաձայն որի` երկրում 18-ից ցածր տարիքի երեխաները, ովքեր սեռական բռնության են ենթարկվել կամ ենթարկվում, այսուհետ կամուսնանան իրենց բռնաբարողի հետ:

Ըստ Siyasihaber-ի՝ այս անմարդկային առաջարկի հեղինակը եղել են Էրդողանի կուսակցության պատգամավորները:

Մեջլիսում ընդդիմադիր կուսակցությունների բուռն դիմադրությանն արժանացած առաջարկը, այնուամենայնիվ, դրվել է քվեարկության: Որոշմանը կողմ քվեարկող ԱԶԿ-ականները եղել են Մեհմեդ Մուշը, Ռամազան Ջանտ, Հալիս Դալքըլըչը, Հաջը Բայրամ Թուրքօղլուն և Իլյաս Շեքերը:

Քանի որ առաջարկին կողմ քվեարկողների թիվը չի հասել 184-ի, առաջարկի քննարկումը հետաձգվել է մինչև երեքշաբթի:

Սկանդալային առաջարկի ընդունման դեպքում անչափահասներն այսուհետ կամուսնանան իրենց դեմ սեռական ոտնձգություն իրականացնողների հետ, ընդ որում` վերջիններս կազատվեն քրեական պատասխանատվությունից: