Յըլդըրըմը հեգնանքով է խոսել Փայլանի կուսակցության դիրքորոշման մասին

Թուրքիայի վարչապետ Բինալի Յըլդըրըմը իշխող «Արդարություն և զարգացում» կուսակցության ժողովի ժամանակ անդրադարձել է քրդամետ Ժողովուրդների դեմոկրատական կուսակցության` մեջլիսում  իր գործունեությունը դադարեցնելու որոշմանը:

Հիշեցնենք, որ ԺԴԿ-ն նման որոշում էր կայացրել իր համանախագահների և պատգամավորների ապօրինի ձերբակալությունից հետո: ԺԴԿ-ի պաշտոնական հայտարարության մեջ մասնավորապես նշվել էր, որ կուսակցության խորհրդարանական խմբակցությունը որոշել է դադարեցնել օրենսդիր մարմնի աշխատանքներին` իր մասնակցությունը՝ ի պատասխան բռնությունների:

Ըստ իշխանամետ «Անադոլու» գործակալության՝ Յըլդըրըմը փորձել է հեգնել՝ պնդելով, որ նրանք սխալ են հասկացել ժողովրդի պահանջը: Ամբողջ ժողովրդի անունից դիմելով ԺԴԿ-ին՝ Յըլդըրըմը ասել է. «Հիմա էլ վեր են կացել, հայտարարում են, որ դադարեցրել են իրենց մասնակցությունը օրենսդիր մարմնի աշխատանքներին:  Ժողովուրդը ձեզ չասաց` դադարեցրեք օրենսդիր մարմնում ձեր գործունեությունը, ասաց՝ ահաբեկչական գործունեությունը, սխալ եք հասկացել»: