Վարչապետի հանձնարարություններից հետո սփյուռքահայերի շրջանում ներդրումներ անելու ցանկությունը մեծացել է. նախարար

Խորհրդարանում լրագրողների հետ զրույցում Սփյուռքի նախարար Հրանուշ Հակոբյանը, անդրադառնալով նախարարություններում տեղի ունեցող օպտիմալացման գործողություններին, նշեց, որ իրենց մոտ էլ փոքրիկ կրճատումներ կլինեն: Նա անդրադարձավ նաև այն հարցին, թե արդյո՞ք սփյուռքահայերը ներդրումներ անում են Հայաստանում.

«Գալիս են և դնում գումարներ բանկերում, որովհետև դրանից օգուտ են ստանում: Ինչ վերաբերում է Սփյուռքին, պետք է ասեմ, որ շատերի մոտ, իրոք, կա վստահության աճ, կա ոգևորություն, մտածում են գալ, այստեղ ներդրումները ակտիվացնել»,- ասաց նախարարը:

Հարցին՝ Կարեն Կարապետյանի վստահեցումներից հետո՞ է ներդրումներ կատարելու ցանկություն առաջացել, Հակոբյանը դրական պատասխան տվեց. «Այո, վարչապետի հանձնարարությունները, պահանջները, ծրագիրը, հարցադրումը, կոնկրետությունը»:

Դիտարկմանը, թե նախկինում ինչն էր խանգարումն ներդրումներ անելուն, արձագանքեց. «Տեսնում են օրենքների փոփոխություն, կարգերի փոփոխություն, մոտեցումների փոփոխություն: Դա, կարծես, նրանց ավելի է ոգևորում»: