Ծախսերի կտրուկ նվազեցում է պետք, հրաժարվում ենք ՊՈԱԿ-ներից, ԾԻԳ-երից. Կարեն Կարապետյան

Այսօր կառավարության նիստում Նարեկ Սարգսյանը ներկայացրեց որոշման նախագիծ, որով հաստատվում էր կառավարությանն առընթեր քաղաքաշինության պետական կոմիտեի աշխատակազմը, կանոնադրությունն ու կառուցվածքը: Վարչապետ Կարեն Կարապետյանը հետաքրքրվեց, թե վերակազմավորման արդյունքում կրճատումներ լինելո՞ւ են, թե՞ ոչ: Նարեկ Սարգսյանը հայտարարեց, որ կրճատումներ կլինեն, և օպտիմալացումների արդյունքում յոթ աշխատակազմ կխոշորացվի:

«Եկեք այսպես անենք. մենք բոլոր գերատեսչություններին իջեցրել ենք հանձնարարություն, որպեսզի առաջարկություն ներկայացնեն`  կառավարության կառուցվածքը փոփոխելու հետ կապված: «Օպտիմալացում» բառը փոխարինում ենք կտրուկ կրճատմամբ,  ՊՈԱԿ-ների բալաստից ազատմամբ: Քանի որ դուք վերակազմավորվում եք, հինգ օր ժամանակ ձեզ, որ ինձ զեկուցեք,  կոմիտե չստեղծենք` մի հատ էլ կոմիտե կրճատենք: Կրճատել ՊՈԱԿ-ները, ավելորդ կառույցները,  հրաժարվում ենք ԾԻԳ-երից. կենտրոնացնում ենք կամ հրաժարվում ենք: Տնօրեն ու բոլոր էդ ատրիբուտիկան մաքրում ենք: Ծախսերի կտրուկ նվազեցում է պետք»,- ասաց  Կարեն Կարապետյանը: