Սոցիալական ապահովության պետական ծառայության 52 աշխատակից է ազատվել աշխատանքից

2016թ. առաջին կիսամյակում կարգապահական տույժ է կիրառվել ՀՀ սոցիալական ապահովության պետական ծառայության 18 աշխատակցի նկատմամբ: Նախորդ տարի այդ ցուցանիշը կազմել է 9: Այս մասին այսօր լրագրողներին հայտնեց աշխատանքի և սոցիալական հարցերի նախարարության սոցիալական ապահովության պետական ծառայության պետ Արմեն Աբրահամյանը:

Նրա խոսքով՝ հաշվետու ժամանակահատվածում ծառայությունում աշխատանքի է ընդունվել 70 աշխատակից, իսկ աշխատանքից ազատվել` 52 աշխատակից: Հաշվետու ժամանակահատվածում ծառայության կողմից իրականացված աշխատանքների արդյունքում հայտնաբերվել է շուրջ 58.500.0 հազար դրամ ոչ իրավաչափ վճարում, արդյունքում` ՀՀ պետական բյուջե է վերադարձվել շուրջ 10.300.0 հազար դրամ:

Արմեն Աբրահամյանի խոսքով՝ նախորդ տարվա դեկտեմբերին տարածքային ստորաբաժանումների 10 ղեկավար է աշխատանքից ազատվել: