Գյումրու բժշկական կենտրոններից մեկի տնօրենին ծեծի են ենթարկել. մանրամասներ

Yerkir.am- ին հայտնի դարձավ, որ այսօր առավոտյան իր տան մոտ ծեծի է ենթարկվել Գյումրիի թիվ 3 ընտանեկան բժշկական կենտրոնի տնօրեն Արտուշ Ասատրյանը: Ոստիկանության լրատվական բաժնից տեղեկացանք, որ դեպքի մասին ահազանգը ստացվել է առավոտյան 8:20-ին:

«Երկու դիմակավորված անձինք բժշկական կենտրոնի տնօրենի տան մոտ հարձակվել են նրա վրա և ծեծի ենթարկել` պատճառելով տարբեր մարմնական վնասվածքներ»,- հայտնեցին ոստիկանությունից:

Արտուշ Ասատրյանին տեղափոխել են Գյումրու բժշկական կենտրոն: Այնտեղից տեղեկացանք, որ Ասատրյանն իրենց մոտ է տեղափոխվել առավոտյան 9:00-ին` «կրծքավանդակի ձախ շրջանում ծակած վերքով, գլխի պատառոտված վերքերով, աջ դաստակի հեմատոմա» ախտորոշմամբ:

«Մոտավորապես 35 րոպե է` վիրահատությունն ավարտվել է, բժիշկների հսկողության տակ է գտնվում նա, կյանքին վտանգ չի սպառնում, վիճակը գնահատվում է կայուն ծանր: Հիվանդի առողջական վիճակով հետաքրքրված է նաև Շիրակի մարզպետ Հովսեփ Սիմոնյանը, ով անձամբ է այցելել հիվանդանոց»,- Yerkir.am-ի հետ զրույցում հայտնեցին Գյումրի բժշկական կենտրոնից: