Սոցիալապես անապահով ընտանիքներին կառավարությունը կտրամադրի հեռուստատեսային ընդունիչ սարքեր

Կառավարության այսօրվա նիստում որոշում կայացվեց սոցիալապես անապահով ընտանիքներին, որպես սոցիալական աջակցություն, հատկացնել DVB-T2 ստանդարտի թվային հեռուստատեսային ընդունիչ սարքեր:

Սոցիալապես անապահով խավին անվճար կարգով DVB-T2 ստանդարտի թվային հեռուստատեսային ընդունիչ սարքերի տրամադրումը նախատեսված է ռադիոհեռուստատեսային հեռարձակման թվային համակարգին անցման հայեցակարգով պետության կողմից ստանձնած պարտավորությամբ և ուղղված է ՀՀ բնակչության սոցիալապես անապահով անձանց տեղեկատվության մատչելիության իրավունքի ապահովմանը:

Նշենք, որ տրանսպորտի և կապի նախարարության, «Հայաստանի հեռուստատեսային և ռադիոհաղորդիչ ցանց» ՓԲ ընկերության կողմից լիովին իրականացվել են ՀՀ տարածքում վերգետնյա թվային հեռուստատեսության ներդրման ժամանակացուցային աշխատանքները, և թվային հեռարձակման անհրաժեշտ համակարգերն ու ենթակառուցվածքները պատրաստ են շահագործման: