Բավականին խնդիրներ եմ դրել իմ առջև. ՀՀԿ խմբակցության նոր պատգամավոր

ԱԺ ՀՀԿ խմբակցության նոր պատգամավոր Կարեն Բեքարյանն այսօր լրագրողների խնդրանքով անդրադարձավ իր առաջիկա գործունությանը: Թեև ասաց, որ դեռևս շուտ է խոսել իր առաջիկա անելիքների մասին, սակայն հավաստիացրեց, որ դրանք շատ են:

Հարցին, թե գուցե մի փոքր կաշկանդվա՞ծ է այսօր, Բեքարյանը պատասխանեց, որ բոլորովին էլ այդպես չէ:

Անդրադառնալով սահմանադրական բարեփոխումների վերաբերյալ իր դիրքորոշմանը` պատգամավորը հայտարարեց, որ դեռևս չի հասցրել նոր տարբերակի տեքստին ամբողջությամբ ծանոթանալ:

«Ես բավականին խնդիրներ եմ դրել իմ առջև և խոստանում եմ հետո խոսել դրանց մասին, հետո անդրադառնալ, եթե դրա անհրաժեշտությունը լինի»,- ասաց նա:

Պատասխանելով հարցին, թե արդյո՞ք ԵԽԽՎ հայաստանյան պատվիրակության կազմում ինքը ներգրավված է լինելու, Բեքարյանը նշեց, որ ով ավելի արդյունավետ աշխատի, նա էլ կլինի: