Արտերկրից եկած շուրջ 200 հայ ընտանիք կհանգստանա Արցախում. Լուսանկարներ

Հունիսի 20-ին Վարդենիս – Քարվաճառ մայրուղով Արցախ են ժամանել հիմնականում ռուսաստանաբնակ շուրջ 200 ընտանիքներ՝ «Արցախ» հայրենակցական միության նախագահ Վարուժան Գրիգորյանի գլխավորությամբ:

Ինչպես հայտնում է «Արցախպրեսը»,  Արցախ ժամանածներին Քարվաճառի մատույցներում անձամբ դիմավորելու է գնացել ԼՂՀ վարչապետ Արայիկ Հարությունյանը: Երիտասարդները հայրենադարձ արցախցիներին դիմավորել են աղ ու հացով, պաստառներով ու ծափողջյուններով:

 «Նախ սա հնարավորություն է տալիս յուրաքանչյուր արցախցու գոնե տարին մեկ անգամ լինել Արցախում և ապրել իր հայրենակիցների հետ: Կապե ՛ք ձեր երեխաներին ու թոռներին ձեր հայրենիքի հետ, որպեսզի նրանք չկորցնեն իրենց ինքնությունը, այդպես նաև մեծապես կաջակցեք Արցախի շենացմանը»,- ասել է ԼՂՀ  վարչապետը:

Նշենք, որ միջոցառման նախաձեռնությունը պատկանում է «Արցախ» հայրենակցական միությանը: