Բաքուն հրաժարվել է ընդունել Amnesty International-ին

Amnesty International իրավապաշտպան կազմակերպությունը ստիպված է եղել չեղյալ համարել ծրագրված այցն Ադրբեջան այն բանից հետո, երբ երկրի կառավարությունը վերջին պահին հրաժարվել է կազմակերպության պատվիրակությանը թողնել Բաքու. հայտնում է contact.az-ը:

Այցը, որը նախատեսված էր «Ադրբեջան. ճնշումներ՝ Եվրախաղերի ֆոնին» խորագրով ճեպազրույցի անցկացման համար, չեղարկվել է այն բանից հետո, երբ Լոնդոնում Ադրբեջանի դեսպանատունը հայտարարել է, որ Ադրբեջանն ի վիճակի չէ այս պահին ընդունել Amnesty International-ին:

«Խորապես հեգնական է, որ միջոցառումը չեղարկվել է այն պահին, երբ, Եվրոպական խաղերին ընդառաջ, երկրում քննադատական ձայները սիստեմատիկ ճնշվում են»,- ասել է կազմակերպության Եվրոպայի և Կենտրոնական Ասիայի գծով ծրագրի փոխտնօրեն Դենիս Կրիվոշեևը: