Արվեստի բնագավառի գործիչները պարգևատրվել են

ՀՀ նախագահի նստավայրում այսօր տեղի է ունեցել նախագահի 2014 թվականի մրցանակների հանձնման արարողությունը: Արվեստի բնագավառում նախագահի մրցանակին են արժանացել Երվանդ Ղազանչյանը, Լալա Պուլուզյանը, Ավետիք Խալաթյանը, Արսեն Գևորգյանը և Վահագն Մարգարյանը` Տիգրան Չուխաջյանի «Կարինե» օպերետի համար: Մանվել Ղալաչյանը` «Երևանի գեղարվեստի պետական ակադեմիայի առօրյան» օֆորտների շարքի համար, Արևիկ Արոյանը` «Գևորգյան ճեմարանի սաները» կտավի համար, իսկ Արեն Մալաքյանն իր «Աղջիկը լուսնի վրա» վավերագրական ֆիլմի համար նույնպես արժանացել են նախագահի մրցանակին:

Դասական երաժշտության բնագավառում նախագահի 2014 թ. երիտասարդական մրցանակ է շնորհվել՝ «Երգեցողություն» անվանակարգում, բարձր կատարողական արվեստի համար՝ Մարիամ Մկրտչյանին և Անդրանիկ Մալխասյանին, իսկ «Գործիքային կատարում» անվանակարգում, լավագույն կատարման համար՝ Սերգեյ Աբրահամյանին (կլառնետ), Շողեր Հովհաննիսյանին (դաշնամուր) և Արտավազդ Համբարյանին (դաշնամուր):

Նախագահի մրցանակին է արժանացել նաև Զավեն Բոյաջյանը` Ումբերտո Էկոյի «Վարդի անունը» գրքի հայերեն թարգմանության համար: