Գեներալ Աստվածատուր Պետրոսյանը հիշեց Ճուտոյին

Գեներալ Աստվածատուր Պետրոսյանն այսօր Եռաբլուրում, վերհիշելով Շուշիի ազատագրումը, առաջին հերթին շեշտեց ազատագրման ժամանակ զոհված Երվանդ Կարապետյանի՝ Ճուտոյի անունը: Գեներալը նշեց, որ Ճուտոն իր վրա է վերցրել հակառակորդի դիպուկահարի արձակած կրակը և փրկել 5 հրամանատարի կյանք: Պետրոսյանը ասաց նաև, որ այդ հրամանատարներից 4-ն այսօր շարքում կանգնած են, իսկ մեկը զոհվել է:

«Շուշիի ազատագրումը երեք-չորս ուղղություններով հրաշալի կազմակերպված հարձակում էր ու կոչվում էր «Հարսանիք լեռներում»։ Այս օպերացիան անակնկալի բերեց հակառակորդին»,- պատմեց գեներալը` հավելելով. «Հակառակորդը 10 մ հեռավորությունից հայ զինվորների վրա կրակում էր այնպիսի զենքով, որը նախատեսված է 2-15 կմ հեռավորության համար»:

Պետրոսյանի բնորոշմամբ` մերոնց ոգին շատ բարձր էր, որին նպաստում էր նաև Կոմանդոսի ղեկավարումը: «Կոմանդոսի, ինքնապաշտպանության կոմիտեի արած գործը և մեր` գիշերուզօր թռչող ուղղաթիռները բերեցին հրաշալի հաղթանակի»,- ասաց նա: