Ազգային արխիվը կարևոր փաստաթղթեր կհրապարակի Ցեղասպանության 100-րդ տարելիցի շրջանակներում

Ցեղասպանության 100-րդ տարելիցի հետ կապված` Հայաստանի ազգային արխիվը մի շարք միջոցառումներ է նախատեսել: Լրագրողների հետ հանդիպման ժամանակ Ազգային արխիվի տնօրեն Ամատունի Վիրաբյանը նշեց, որ այս տարի լույս կտեսնեն «Հայերի Ցեղասպանությունը Օսմանյան Թուրքիայում» գրքի 4-րդ և 5-րդ հատորները` արդեն ռուսերեն և իսպաներեն /թուրքերեն տարբերակն արդեն կա/:

Ըստ նրա` առաջին հերթին պետք է համապատասխան փաստաթղթերի հրատարակման հարցերով զբաղվել, հետո արդեն դրանք տարբեր երկրներում ցուցադրել:

«Օրինակ` Մոսկվայում ռուսերեն-անգլերեն կցուցադրվեն փաստաթղթեր /գրքի տեսքով/ հայերի` Ցեղասպանության հետևանքով կրած տնտեսական կորուստների վերաբերյալ: Շուտով Պատմության թանգարանում կբացվի ցուցահանդես` Ցեղասպանությունից հետո մեր ժողովրդի ճակատագրին նվիրված: Մենք գրքի տեսքով պատրաստվում ենք ներկայացնել նաև 100 մարդկանց, ովքեր վերապրել են Ցեղասպանությունը, և նրանք կամ նրանց ժառանգները համաշխարհային ճանաչում ունեն»,- ասաց Վիրաբյանը:

Նա տեղեկացրեց նաև, որ հայ-ֆրանսիական համատեղ վիրտուալ ցուցահանդես կբացվի, որտեղ նյութեր կներկայացվեն Առաջին աշխարհամարտի տարիներին հայ-ֆրանսիական համագործակցության մասին: