Գյումրիում բժիշկների նկատմամբ բռնությունների երկու դեպքն էլ կապված չի եղել շտապօգնության ուշացման հետ

Բժիշկների նկատմամբ բռնությունը, ինքնադատաստանը խիստ դատապարտելի և զազրելի է` անկախ նրանց մեղքի բաժնից: Այս մասին լրագրողների հետ հանդիպման ժամանակ հայտարարեց ՀՀ առողջապահության նախարար Արմեն Մուրադյանը:

Ըստ նրա` բժշկի մեղքի բաժինը պետք է որոշի դատարանը, իսկ մինչ այդ բժշկին ինքնադատաստանի ենթարկելն ուղղակի անկարելի է:

«Երևանում շտապօգնության մեքենայի մոտենալու համար նախատեսված ժամկետը 15 րոպեն է, իսկ մարզերում` 20 րոպեն: Ինչ վերաբերում է վերջին շրջանում Գյումրիում բժիշկների նկատմամբ բռնությունների երկու դեպքերին, երկուսի դեպքում էլ խնդիրը կապված չի եղել շտապօգնության ուշացման հետ, երկու դեպքում էլ անմարդկային և անբարոյական վերաբերմունք է ցուցաբերվել բժիշկների հանդեպ»,- ասաց նախարարը:

Նա տեղեկացրեց նաև, որ առաջիկայում նախարարությունը չափորոշիչներ է մշակելու, որոնց շնորհիվ կապահովեն նաև բժիշկների իրավունքները: