Կողմնակից են գործնական քայլերի. դատախազության արձագանքը` Կարեն Անդրեասյանի կողմնապահությանը

Արդեն հայտնել ենք, որ այսօր Հայաստանում մարդու իրավունքների պաշտպանությանը նվիրված կլոր սեղանին հրավիրված չէր ՀՀ գլխավոր դատախազ Գևորգ Կոստանյանին: ՄԻՊ Կարեն Անդրեասյանն այդ հարցում կողմնապահություն էր դրսևորել, նրա խոսքով` իրենք հրավիրել են միայն այն պաշտոնյաներին, որոնց հետ հնարավոր է համագործակցել, իսկ դատախազության հետ այս տարի չի ստացվել համագործակցել:

Yerkir.am-ի հետ զրույցում անդրադառնալով Կոստանյանին չհրավիրելու փաստին` դատախազության հանրային կապերի և լրատվության ծառայությունից հայտնեցին, որ իրավունքների պաշտպանությանը վերաբերող հրապարակային քննարկումները վատ չեն, սակայն իրենք կողմնակից են մարդու իրավունքների պաշտպանության ոլորտում գործնական քայլերի ձեռնարկմանը, որի արդյունքները, ըստ նրանց, տեսանելի են լինում, երբեմն` թեկուզ ուշացումով:

Դատախազությունից, միաժամանակ, հայտնեցին, որ իրենք մշտապես և անվերապահորեն պատրաստ են համագործակցել` մարդու իրավունքների պաշտպանությանն ուղղված ցանկացած գործնական առաջարկի դեպքում: