Արտեմ Ասատրյանն աշխատող մայրերի իրավունքների կապակցությամբ եւս մտահոգություն ունի

Մայրության նպստաների հետ կապված խնդիրը շարունակում է մնալ չլուծված:

Այսօր լրագրողների հետ զրույցում ՀՀ աշխատանքի և սոցիալական հարցերի նախարար Արտեմ Ասատրյանը հույս հայտնեց, որ քննարկումների արդյունքում կգտնվեն այնպիսի մեխանիզմներ, որոնք կբավարարեն բոլոր շահագրգիռ անձանց:

Նա նշեց, որ իր ղեկավարած նախարարությունը նախ ներկայացրել է նպաստների հետ կապված մտահոգություններն ու խնդիրները: Ներկայումս նախագիծը վերջնական տեսքի են բերում, որն առաջիկա երկու-երեք օրերին ներկայացվելու է ԱԺ սոցիալական հարցերի հանձնաժողովին:

«Բոլորս ունենք այդ մտահոգությունը, որ աշխատող հղի կինը, որը համապատասխան եկամուտ է ստանում,  որևէ կերպ իրավունքի ոտնահարում չունենա»,- ասաց նախարարը:

Ի պատասխան հարցին, թե արդյո՞ք ճիշտ է այն տպավորությունը, որ վարչապետն այս հարցում փորձում է ամբողջ մեղքը գցել նախարարի վրա, Արտեմ Ասատրյանը չհամաձայնեց` ասելով, որ վարչապետն իր հստակ մտահոգությունն է հայտնել` արդար լուծումների առումով: