Խորհրդարանական եռյակը որոշեց, որ չպետք է բոյկոտի օրակարգը

Այսօր երեք խորհրդարանական ուժերը` ՀԱԿ-ը, «Ժառանգությունը» ու ԲՀԿ-ն, աշխատանքային քննարկում են անցկացրել քառօրյայի օրակարգի վերաբերյալ:

«Ժառանգություն» խմբակցության ղեկավար Ռուբեն Հակոբյանի խոսքով` իշխանությունն ամեն ինչ անում է, որպեսզի ընդդիմության արտահերթ հարցերը չքննարկվեն, դիմելով մանր խորամանկության։ Ըստ պատգամավորի` իշխանության գործողությունները մեկ նպատակ են հետապնդում, որ  ժամանակ ձգեն, օրակարգը լցնեն օրենքներով, որ ընդդիմությունը չկարողանա արտահերթ կարգով քննարկել պետության մեջ ստեղծված իրավիճակը:

Ռուբեն Հակոբյանը պնդում է, որ խախտվում է ԱԺ կանոնակարգը, քանի որ արհեստականորեն նախագծեր են կցում իրար, որոնք կապ չունեն սահմանամերձ համայնքների հարցերի հետ:

«Կար երկու առաջարկ` կարելի է բոյկոտել կամ չշարունակել մասնակցել քննարկմանը։ Մենք որոշել ենք ակտիվորեն մասնակցել այդ նախագծերի քննարկմանը»,- ասաց պատգամավորը: