«Մարդակենտրոն» ՕԵԿ-ը «անկուշտներին զսպելու» օրենք կմտցնի

ԱԺ հայտարարությունների ժամին առաջին ելույթի հնարավորությունը տրվեց ՕԵԿ խմբակցության պատգամավոր Հովհաննես Մարգարյանին: ԱԺ փոխխոսնակ Էդուարդ Շարմազանովը նշեց. «Առաջինը Դուք եք, դե քանի որ դուք հիմա ընդդիմություն եք»:

Հովհաննես Մարգարյանի ընդդիմադիր ելույթն ուղղված էր սուպերմարկետներին ու մեծահարուստներին: Նա նշեց, որ ՕԵԿ-ը, անկախ նրանից, իր գործունեությունը ծավալում է ընդդիմադիր, թե` իշխանության դաշտում, հավատարիմ է մնալու իր սկզբունքներին, այսինքն` ՕԵԿ-ը պարտադիր բարձրաձայնելու է հասարակությանը հուզող խնդիրների մասին:

«Տասնյակ փոքր ու միջին խանութներ պաշտպանության կարիք ունեն, սուպերմարկետները չեն թողնում, որ դրանք գոյատևեն, և ազատ մրցակցությունը հայտնվել է կապանքների մեջ: Անընդունելի ենք համարում մեծահարուստներին շքեղության հարկից ազատելը, իսկ որոշ անկուշտների համար ժամանակն է մտցնել անկուշտության մասին օրենք»,- ասաց Հովհաննես Մարգարյանը:

ՕԵԿ պատգամավոր Մհեր Շահգելդյանն էլ հայտարարեց, որ ՕԵԿ-ը այսուհետ ընդդիմադիր դաշտում ծավալելու է մարդակենտրոն գործունեություն, այսինքն` հանդես են գալու այն բարեփոխումների օգտին, որոնք մարդակենտրոն են լինելու իրենց բնույթով: «Հետագայում մենք այլևս կաշկանդված չենք մեր դիրքորոշոմները հայտնելու մեջ»,- ասաց նա: