Ամերիկայի Հայ դատի հանձնախումբն արձագանքել է Բարաք Օբամային

ԱՄՆ նախագահ Բարաք Օբամայի՝ ապրիլի 24-ի «Հայոց հիշատակության օրվան» նվիրված ուղերձին արձագանքել է Ամերիկայի Հայ դատի հանձնախմբի (ANCA) գործադիր տնօրեն Արամ Համբարյանը:

«Նախագահ Օբաման շարունակում է վարել արտաքին աղբյուրների վրա հիմնված իր քաղաքականությունը Հայոց ցեղասպանության հարցի շուրջ՝ Թուրքիային արդյունավետ հնարավորություն տալով վետո սահմանել մարդկության դեմ կատարված հանցագործությանը Ամերիկայի պատասխանի վրա:

Տխուր է տեսնել մեր նախագահին, ով իշխանության է եկել` խոստանալով ճանաչել Հայոց ցեղասպանությունը, բայց այժմ օտար կառավարության քաղաքական ճնշմամբ փորձում է այլ բան ասել մեր երկրի արխիվներում մանրամասնորեն և ամբողջական ներկայացված Ցեղասպանության մասին:

Փաստը մնում է փաստ, որ հայ-թուրքական հարաբերություններում ցանկացած բարելավում պահանջելու է, որ պաշտոնական Անկարան ընդունի իր ժխտողականությունը, իր բարոյական ու նյութական պատասխանատվությունը և համաձայնի մարդկության հանդեպ իրականացված և դեռևս անպատիժ մնացած հանցագործության հարցում միջազգային ճշմարիտ ու արդար որոշմանը:

Մենք խորապես հիասթափված ենք, քանի որ ԱՄՆ նախագահ Բարաք Օբաման չկատարեց իր խոստումը հերթական անգամ՝ հետևելով նախորդ նախագահներին», - հայտարարել է Արամ Համբարյանը: