Ձեռնարկվում են համապատասխան միջոցներ. Էդվարդ Նալբանդյանը՝ քեսաբահայության մասին

Այսօր ԱԺ-ում կառավարության հետ հարցուպատասխանի ժամանակ ՀՀ արտգործնախարարը խոսեց Քեսաբում տիրող իրավիճակի ու հայկական համայնքի մասին:

Նա նշեց, որ նախարարությունը խորապես մտահոգված է այնտեղ տիրող իրավիճակով, և Հայաստանի կառավարությունը անում է հնարավորը՝ քեսաբահայությանը օժանդակելու համար:

«Ձեռնարկվում են համապատասխան քայլեր: Մեր մտահոգությունը բարձրացվել է նաև երկկողմ հարթակում շփումների ժամանակ: Մեր դեսպանությունը հանձնարարականներ է ստացել ու համապատասխան աշխատանքներ է տանում: Քեսաբահայ մոտ 700 ընտանիք ապաստանել է Լաթաքիայում: Իսկ նրանք, ովքեր չունեն ազգականներ, ապաստանել են եկեղեցու բակում:

Մեր պատգամավորները հանդիպել են քեսաբահայության հետ, մի երկու ժամից նրանք կվերադառնան Դամասկոս: Նրանց ուղեկցում է Սիրիայում ՀՀ դեսպանը:

Իհարկե,  դժվար կացության մեջ են մեր հայրենակիցները: Եթե նյութական աջակցության կարիք կա, ճիշտ կլինի օգնությունը կազմակերպել Սփյուռքի նախարարության միջոցով: Մենք կշարունակենք բոլոր հնարավոր դիվանագիտական խողովակներով հեշտացնել այնտեղ տիրող դժվար իրավիճակը»,- ասաց Էդվարդ Նալբանդյանը: