Վարդան Պետրոսյանին այսօր կբերեն դատարան

Այսօր Կոտայքի մարզի ընդհանուր իրավասության առաջին ատյանի դատարանում նշանակված է դերասան Վարդան Պետրոսյանի գործով առաջին դատական նիստը:

Պետրոսյանի պաշտպան, փաստաբան Նիկոլայ Բաղդասարյանը yerkir.am-ի հետ զրույցում նշեց, որ դիմում է ուղարկել դատարան` միջնորդելով հետաձգել այսօրվա դատական նիստը, պատճառը գործում նոր պաշտպաններ ներգրավելն է:

Ըստ Բաղդասարյանի` մարտի 26-ին դերասանի համար Ֆրանսիայից երկու պաշտպան կժամանեն Հայաստան` մեկը` հայազգի, մյուսը` ֆրանսիացի, ովքեր իր հետ միասին կներկայացնեն Պետրոսյանի շահերը: Այդ պաշտպանները հավանաբար կհետևեն գործի քննությանը, որպեսզի հետագայում, անհրաժեշտության դեպքում, զբաղվեն Եվրադատարան դիմելու հարցերով:

փաստաբանը սակայն նշեց, որ իր պաշտպանյալին այնուամենայնիվ այսօր կբերեն դատարան:

Հիշեցնենք, որ 2013 թվականի հոկտեմբերի 20-ին Եղվարդ-Երեւան ավտոճանապարհահատվածում տեղի էր ունեցել ՃՏՊ: Բախվել էին Վարդան Պետրոսյանի վարած BMW մակնիշի եւ  «ՎԱԶ 2121» մակնիշի  ավտոմեքենաները: Դեպքի առթիվ ոստիկանության Նաիրիի բաժնում հարուցվել է քրեական գործ, Վարդան Պետրոսյանին մեղադրանք է առաջադրվել ՀՀ  ՔՕ-ի 242-րդ հոդվածի 3-րդ մասի հատկանիշներով: