Սիրիահայ երիտասարդների դանակահարության մեջ մեղադրվողը հետախուզման մեջ է

Նոյեմբերի 17-ին երևանյան «Լոնդոն» բարի սիրիահայ աշխատակիցներ Շանթ Քոչյանին և Րաֆֆի Բարդաքչյանին դանակահարելու գործով որպես մեղադրյալ է ներգրավվել Խաչատուր Խաչատրյանը: Նրա նկատմամբ հայտարարվել է հետախուզում և որպես խափանման միջոց ընտրվել կալանավորումը: Այս մասին,  yerkir.am-ի հարցմանն ի պատասխան, հայտնեցին ոստիկանությունից:

Նշանակված դատաբժշկական փորձաքննությունների եզրակացություններով`  Ր. Բարդաքչյանի առողջությանը պատճառվել է ծանր վնաս, իսկ Շ. Քոչյանի առողջությանը` միջին ծանրության: Խաչատուր Խաչատրյանին մեղադրանք է առաջադրվել ՀՀ քրեական օրենսգրքի 112-րդ հոդվածի 1-ին մասով և 113-րդ հոդվածի 1-ին մասի հատկանիշներով:

Ավելի վաղ yerkir.am-ը հայտնել էր, որ դեպքի օրը 5 երիտասարդներ ոգելիչ խմիչքի ազդեցության տակ վիճաբանություն են սկսել ակումբի տիրոջ հետ և փորձել դանակահարել նրան, ինչը փորձել են կանխել ակումբի սիրիահայ աշխատակիցները: Արդյունքում վնասվել էր Շանթի ձեռքը, իսկ Րաֆֆի Բարդաքչյանը մեջքից դանակի հարված է ստացել: Երիտասարդներին տեղափոխել էին Առաջին համալսարանական հիվանդանոց: