Դերենիկ Դումանյանը դատի չի տվել Լյուդմիլա Սարգսյանին

ՀՀ առողջապահության նախարար Դերենիկ Դումանյանը դատի չի տվել Լյուդմիլա Սարգսյանին, պարզապես դիմել է գլխավոր դատախազին, որ ստուգեն ինֆորմացիան եւ մեղավորներին պատժեն: Այս մասին լրագրողներին հայտնեց ինքը` նախարարը:

Հիշեցնենք, որ տարեվերջին ԱԺ ՀԱԿ խմբակցության պատգամավոր Լյուդմիլա Սարգսյանը բարձրացրել էր բուժհաստատություններում «ատկատի» խնդիրը, որի գոյության մասին ավելի վաղ հիշատակել էր նաեւ հանրապետության նախագահ Սերժ Սարգսյանը:

«Մինչեւ դատախազին դիմելը մենք գրավոր դիմել ենք նաեւ տիկին Սարգսյանին` պահանջելով ներկայացնել ապացույցներ, սակայն նա մեզ պատասխանեց, որ ինքը պարտավոր չէ ապացույցներ ներկայացնել: Այնուհետեւ մենք դիմեցինք դատախազին, քանի որ վստահ ենք, որ նման խնդիր չկա: Այնուամենայնիվ, շնորհակալ ենք Լյուդմիլա Սարգսյանին հարցն արծարծելու համար»,- ասաց Դումանյանը:

Հարցին, թե այդ դեպքում ինչո՞ւ նախարարը խնդիրը քննելու համար ՀՀ նախագահի հայտարարությունը հաշվի չէր առել, Դումանյանը պատասխանեց, որ, երբ նախագահը բարձրացրել էր հարցը, ինքն առողջապահության նախարար չէր, ուստի իրավասու չէր հարցով զբաղվելու: