Պռոշյանի գյուղապետի սպանության գործով կալանավորված Պետրոսյանն ազատ է արձակվել

Պռոշյանի գյուղապետ Հրաչ Մուրադյանի սպանությունը կատարելու կասկածանքով շուրջ 10 ամիս կալանքի տակ գտնվող Արայիկ Պետրոսյանը մոտ 2 ժամ առաջ ազատ է արձակվել «Նուբարաշեն» ՔԿՀ-ից: Այս մասին yerkir.am-ի հետ զրույցում ասաց Պետրոսյանի պաշտպան Նորայր Նորիկյանը:

Նախաքննական մարմինը  պարզել է, որ օպերատիվ քննչական գործողությունների արդյունքում` հանցագործության կատարման գործում Պետրոսյանի մասնակցությունը չի հաստատվել, այդ իսկ պատճառով նրա նկատմամբ ընտրված խափանման միջոցը վերացվել է:  

Հիշեցնենք, որ Հրաչ Մուրադյանը սպանվել է 2013թ. ապրիլի 2-ին: Ա.Պետրոսյանին մեղադրանք էր առաջադրվել ՀՀ քրեական օրենսգրքի 104-րդ հոդվածի 2-րդ մասի 2-րդ կետով և 235-րդ հոդվածի 1-ին մասով: