Մանվել Բադեյանը ներողություն է խնդրել եզդիներից

Այսօր «Սինջար եզդիների ազգային միավորման» մի քանի անդամներ հանդիպել են Ազգային ժողովի փոխխոսնակ Էդուարդ Շարմազանովի հետ:

«Սինջար եզդիների ազգային միավորում» ՀԿ-ի խորհրդից հայտնում են, որ Շարմազանովի հետ հանդիպման ընթացքում իրենք տեղեկացրել են, որ եզդի համայնքը վրդովված է ԱԺ պատգամավոր Մանվել Բադեյանի պահվածքից և պահանջում է, որպեսզի պատգամավորը ներողություն խնդրի եզդի ժողովրդից:

Եզդիները Շարմազանովին տեղեկացրել են, որ Մանվել Բադեյանը հետագայում նշել էր, որ ինքը չի ասել` փողոցում կանգնած եզդի, այլ ասել է` փողոց մաքրող եզդի:  Այս արտահայտությունը ևս իրենց համար վիրավորական է, քանի որ փողոց մաքրելը եզդու կարգավիճակ չէ:

«Հանդիպումից հետո «Սինջար»-ը հարկ է համարում տեղեկացնել բոլոր եզդիներին, որ ԱԺ պատգամավոր Մանվել Բադեյանը նպատակ չի ունեցել վիրավորելու եզդիներին և ներողություն է խնդրում բոլոր եզդիներից այդ միջադեպի համար»,- ասվում է միավորման տարածած հաղորդագրության մեջ: