Պարզվել է, որ ''100% pasteurized milk''-ը թան է…

Կաթի փոխարեն՝ թան` «Բոնիլատի» տարաներում: Սպառողները դիմում-բողոք են ներկայացրել ՏՄՊՊՀ-ին:

Գերմանիայի միջազգային համագործակցության ընկերության (GIZ)  ներկայացուցիչը դիմել է Տնտեսական մրցակցության պաշտպանության պետական հանձնաժողովին՝ տեղեկացնելով, որ  գնել է «Բոնիլատ» ընկերության կողմից արտադրված 1 լիտրանոց շշով ապրանք, որի վրա գրված է եղել՝ «100% pasteurized milk»՝ պաստերացված կաթ, սակայն հետագայում պարզվել է, որ շշի մեջ ոչ թե կաթ է, այլ թան: Այսօր ՏՄՊՊՀ նիստի ժամանակ այդ մասին հայտնեց հանձնաժողովի ներկայացուցիչը:

Հանձնաժողովի կողմից վարչական վարույթ հարուցելուց հետո  «Բոնիլատ» ընկերությունը հայտնել է, որ թան ապրանքատեսակի պիտակի վրա առկա գրառումները ճշգրտվել են և ներկայացվել է ապրանքատեսակի նոր՝ փոփոխված պիտակի օրինակը:

«Բոնիլատ» ընկերության վարքագիծը հանձնաժողովը անբարեխիղճ մրցակցության դրսևորում է համարում, քանի որ օրենքի պահանջին համապատասխան` արտադրողը  պարտավոր է լիարժեք և պատշաճ տեղեկատվություն տրամադրել սպառողին վաճառվող ապրանքատեսակի վերաբերյալ: 

Ընկերության նկատմամբ կիրառվեց ֆինանսական խիստ տուգանք` տարեկան հասույթի 1 տոկոսի չափով: