Հայտնի է Մալայանի անվան հիվանդանոցի հրդեհի պատճառը

Այսօր` վաղ առավոտյան, ժամը 04.25-ին ԱԻՆ-ում ահազանգ էր ստացվել, որ հրդեհ է բռնկվել Ֆուչիկի փողոցի թիվ 30 հասցեում՝ Մալայանի անվան ակնաբուժական կենտրոնի 5-րդ հարկում: ՀՀ արտակարգ իրավիճակների նախարարությունը տեղեկացնում է, որ դեպքի վայր է մեկնել երեք մարտական հաշվարկ, մեկ ավտոսանդուղք և ՃԿԿ ԱԻ արձագանքման խումբը: Հրդեհը մարվել է տեղի ուժերով: Պարզվել է, որ հրդեհը բռնկվել է կենտրոնի 605-րդ սենյակում:

Yerkir.am-ի հետ զրույցում հիվանդանոցի տնօրեն Ալեքսանդր Մալայանը հայտնեց, որ հրդեհն առաջացել է էլեկտրական վթարի պատճառով, մասնավորապես` շարքից դուրս է եկել խորհրդային տարիների արտադրության լուսամփոփը:

Մալայանը հավաստիացրեց, որ հիվանդանոցը մեծ վնաս չի կրել: Ամբողջությամբ այրվել է մեկ մահճակալ՝ ներքնակով: Հիվանդասենյակում գտնվող` 1940թ. ծնված քաղաքացին  հրդեհի հետևանքով չի տուժել, նա տեղափոխվել է այլ հիվանդասենյակ: