Սահակաշվիլին գրեթե ամբողջությամբ ծախսել է նախագահական հիմնադրամի գումարները

Արդեն տեղեկացրել ենք, որ Վրաստանի նախագահ Միխեիլ Սահակաշվիլին երեկ անակնկալ այցով Բրյուսել է մեկնել՝ առանց երկրի ԱԳՆ-ին զգուշացնելու: Սահակաշվիլին Բյուսելում հանդիպել է Եվրոպական հանձնաժողովի նախագահ Ժոզե Մանուել Բարոզուի հետ և հայտարարել, որ երեք շաբաթից լրանում են իր՝ նախագահի լիազորությունները, իսկ վարչապետ Բիձինա Իվանիշվիլին բազմիցս սպառնացել է իրեն դատական հետապնդումներով:

Պետրե Մամրաձեն, ով 13 տարիների ընթացքում ղեկավարել է Վրաստանի կառավարության աշխատակազմը, Известия-ի հետ զրույցում անդրադարձել է Սահակաշվիլիի «փախուստին» և նշել, որ արտասահմանյան հովանավորները Սահակաշվիլիին չեն կարողանա օգնել, և նա պատասխան կտա օրենքի առաջ:

Մամրաձեն նաև նշել է, որ Սահակաշվիլին  գրեթե ամբողջությամբ ծախսել է նախագահական հիմնադրամ գումարները. 5 մլն լարիից մնացել է ընդամենը 5 հազար լարի:

Նա հայտնել է, որ Սահակաշվիլին չի ընդգրկվի ԵՄ-ի հետ ասոցացման համաձայնագիրը վավերանելու նպատակով  Վիլնյուս մեկնող պատվիրակության կազմում: Իսկ Սահակաշվիլին ուղղակի երազում էր ավարտել իր նախագահությունը այդ ֆորումին էֆեկտիվ մասնակցությամբ: