''Ժառանգություն''-ում մամուլի հրապարակումներից են իրենց մասին իմանում

«Ժառանգություն»-ում տեղյակ չեն, թե ինչու է Ռուբեն Հակոբյանը խմբակցության ղեկավարի պաշտոնից հրաժարվելու որոշում կայացրել։

Կուսակցության վարչության փոխնախագահ Արմեն Մարտիրոսյանը մամուլից է տեղեկացել և շտապել է Ազգային ժողով՝ պարզելու, թե ինչ է տեղի ունեցել։

ԱԺ-ում փակ խորհրդակցություն եղավ Արմեն Մարտիրոսյանի, Զարուհի Փոստանջյանի և Թևան Պողոսյանի միջև: Մարտիրոսյանը լրագրողների հետ զրույցում ասաց, որ առայժմ վերջնական պատկերացում չունի, թե ինչու է Ռ․ Հակոբյանը նման որոշում կայացրել՝ ընդգծելով, որ պետք է անպայման զրուցի նրա հետ։

Մարտիրոսյանի խոսքով՝ Հակոբյանի որոշումն իր համար անակնկալ էր, քանի որ նման հարց կուսակցության վարչությունում չի քննարկվել։ Հովհաննիսյանի հետ Արմեն Մարտիրոսյանը չի զրուցել և չգիտի՝ նա տեղյակ է, թե` ոչ։

Հավելենք, որ ԱԺ նիստի մեկնարկին Հովիկ Աբրահամյանը Ռուբեն Հակոբյանի հրաժարականի մասին որևէ պաշտոնական հայտարարություն չարեց։ Պարզ չէ, թե ինչու, քանի որ Հակոբյանն արդեն ԶԼՄ-ների հետ զրույցում հայտարարել է, որ հրաժարվում է խմբակցության ղեկավարի պաշտոնից: