Եվս մեկ հուշարձան` ″Համաշխարհային հուշարձանների դիտանցման″ ցանկում

ՀՀ Լոռու մարզի Թումանյանի շրջանի Դսեղ գյուղից 2 կմ հյուսիս-արևելք` Դեբետի աջ վտակ Մարց գետակի ձախակողմյան ձորալանջի փոքրիկ հարթակի վրա գտնվող Սուրբ Գրիգոր Բարձրաքաշ վանական համալիրը ներառվել է 2014 թ. «Հուշարձանների համաշխարհային դիտանցման» ցանկի մեջ:

«Հուշարձանների համաշխարհային դիտանցումը» Հուշարձանների համաշխարհային հիմնադրամի պահպանության առաջնային ծրագրերից է, որի նպատակն է միջազգային հանրության ուշադրության կենտրոնում պահել մշակութային ժառանգության վայրերում հանդիպող մարտահրավերները: 1996 թ. ի վեր երկու տարին մեկ անգամ հիմնադրամը բարձրաձայնում է առավել վտանգված մշակութային ժառանգության մասին: Ցանկի մեջ ներգրավվելը հնարավորություն է ընձեռում ներկայացնել տեղանքը ոչ միայն տեղական, այլև միջազգային մակարդակով:

2014 թ. ցանկը ներառում է 67 հուշարձան՝ 47 երկրից, որոնցից յուրաքանչյուրը վկայությունն է մարդկային բարձրագույն կամքի և մշակութային բազմազանության՝ ժամանակակից հրաշալիքներից մինչև հնագույն քաղաքակրթություններ, հեռավոր բնակավայրեր և խորհրդանիշ հանդիսացող տեղական հուշարձաններ: