″Կոշիկներս Պոլիս ձգեցի″-ն` Բեյրութի միջազգային կինոփառատոնում

Սփյուռքահայ կինոռեժիսոր Նիկոլ Պեզճյանի «Կոշիկներս Պոլիս ձգեցի» ֆիլմը մասնակցում է Բեյրութի միջազգային կինոփառատոնին:

Ֆիլմը, yerkir.am-ի տեղեկություններով, հենց այսօր էլ կցուցադրվի Բեյրութի «Planete Abraj Furn El Chebbek» կինոթատրոնում: Այնուհետեւ այն կցուցադրվի Լոնդոնում, Բոստոնում, Նյու Ջերսիում եւ Տորոնտոյում:

Ֆիլմի պրեմիերան տեղի է ունեցել այս տարի «Ոսկե ծիրան» կինոփառատոնում: Այն Լիբանանի, Հայաստանի եւ Թուրքիայի համատեղ արտադրանք է:

Գլխավոր դերում ներկայացել է լիբանանահայ մոդեռնիստ պոետ Սաքո Արյանը, որն ուղեւորություն է ձեռնարկում իր նախնիների քաղաք Ստամբուլ, ուր ձգվում են նրա մշակութային արմատները: Սաքոն շրջում է Ստամբուլի հին փողոցներով, որոնք ժամանակին հայերով էին բնակեցված, հին գերեզմանոցներով, ուր պոետներն են հանգչում, հին եկեղեցիներով եւ դարից էլ հին միջնակարգ դպրոցով: Հանդիպում է հայտնի եւ անհայտ մարդկանց` հայերի եւ թուրքերի, լսում նրանց պատմությունները, կարծիքները: