Տարածաշրջանային զարգացումները թևակոխում են հետաքրքիր փուլ

Եվրոպական և Եվրասիական միությունների անդամակցության և ազատ առևտրի պայմանագրի ստորագրման հարցերում Ռուսաստանի վախերը հիմնազուրկ են. լրագրողներին այսօր ասաց «Ժառանգություն» կուսակցության վարչության գլխավոր քարտուղար Ստյոպա Սաֆարյանը` անդրադառնալով տարածաշրջանային զարգացումներին:

Նրա դիտարկմամբ` Հայաստանում այս հարցի շուրջ վերջին մեկ տարվա ընթացքում նկատվում է որոշակի դիսկուրս:

«Որոշ լարվածություն է նկատվում Հայաստան-Ռուսաստան հարաբերություններում, և արդեն իրավիճակը այս տարածաշրջանում լարվում է: Ես կարծում եմ,որ Հայաստանը միայնակ չի կարող դեմ դուրս գալ ռուսական ճնշումներին»,- նշեց բանախոսը և անդրադարձավ Սերժ Սարգսյանի թիմակիցների հայտարարությանը, որ Հայաստանի Եվրասիական ինտեգրումը չի խանգարում Եվրոպական ինտեգրմանը և անհասկանալի համարեց այդ հայտարարությունը:

«Հայաստանը չի կարող միաժամանակ անդամակցել Եվրասիական և Եվրոպական միություններին` դրանք իրար հակասում են: Կարծում եմ, որ մենք բավականին բուռն և հերաքրքիր զարգացումների ականատես ենք լինելու ապագայում»,-իր խոսքը եզրափակեց Ս. Սաֆարյանը: