Լոս Անջելեսում մեկնարկել է Խաչատրյանական տարին

Լոս Անջելեսի «Disney Consert Hall»-ում հանդիսավորությամբ մեկնարկել է Արամ Խաչատրյանի տարին:

Երեկոյի ընթացքում ելույթ են ունեցել տեղի ֆիլհարմոնիկ և կամերային նվագախմբերի մենակատարներ, ներկայացվել են աշխարհահռչակ կոմպոզիտորի հայտնի ստեղծագործություններ, ցուցադրվել կոմպոզիտորի գործունեությունը ներկայացնող արխիվային կադրեր, այդ թվում` Արամ Խաչատրյանի` 1974 թվականին Լոս Անջելես կատարած այցի տեսաժապավենը:

Միջոցառման ընթացքում հայտարարվել է Հայաստանի ֆիլհարմոնիկ նվագախմբի բարեկամների խմբի ստեղծման մասին, որը սատարելու է ֆիլհարմոնիկի գործունեությանը' հայ երաժիշտներին աջակցելով հայկական դասական երաժշտությունն աշխարհին ներկայացնելու գործում:

Արամ Խաչատրյանի հոբելյանական տարվա միջոցառումների մեկնարկի առթիվ Լոս Անջելեսում է գտնվում նաեւ Հայաստանի ֆիլհարմոնիկ նվագախմբի գլխավոր դիրիժոր Էդվարդ Թոփչյանը, որը երեկոյի նախօրյակին դասախոսությամբ հանդես էր եկել Հարավային Կալիֆոռնիայի համալսարանում` ներկայացնելով մեծ կոմպոզիտորի կյանքն ու գործունեությունը:

Արամ Խաչատրյանի ծննդյան 110-ամյակին նվիրված հաջորդ միջոցառումը կլինի Եգիպտական թատրոնում, որտեղ կցուցադրվի «Արամ Խաչատրյան» ֆիլմը: