Տաքսիների հաշվիչները պարտադիր կստուգաչափվեն

Տաքսի ավտոմեքենաներով ուղեւորափոխադրումների ոլորտի զարգացման բարեփոխումների համատեքստում տաքսիների հաշվիչները պետք է լինեն պարտադիր ստուգաչափված, իսկ ուղեւորը պետք է հստակ իմանա` մատուցված ծառայության դիմաց ինչ գումար է վճարելու. լրագրողներին այսօր տեղեկացրեց տրանսպորտի եւ կապի փոխնախարար Արտաշես Ավետիսյանը:

Yerkir.am-ի հարցին` իսկ ո՞վ պետք է ստուգաչափի, ի՞նչ սկզբունքներով եւ ինչպե՞ս ուղեւորները պետք է իմանան, որ տվյալ մեքենայի հաշվիչը ստուգաչափված է, փոխնախարարը պատասխանեց, որ հաշվիչների ստուգաչափումը պարտադիր է նաեւ այսօր, բայց նշեց նաեւ, որ այսուհետ ավելի մեծ, հատուկ ուշադրություն է դարձվելու այս հանգամանքին: Իսկ թե ինչպե՞ս ուղեւորները պետք է իմանան` տվյալ մեքենայի հաշվիչը ստուգաչափվե՞լ է, թե՞ ոչ, փոխնախարարը հարցով պատասխանեց` իսկ ինչո՞ւ ուղեւորը պետք է դա իմանա:

«Բայց եթե ուզում է իմանալ, կարող է տաքսու վարորդից պահանջել` ներկայացնել փաստաթղթերը, որոնցից երեւում է` տվյալ մեքենային պատկանող հաշվիչը ստուգաչափվե՞լ է, թե՞ ոչ»,- ասաց Ա. Ավետիսյանը: